ఏపీ నుంచి తెలంగాణ, హైదరాబాద్‌కు బస్సులకు రూట్ క్లియర్!.. వివరాలివే

తెలుగు రాష్ట్రాల మధ్య ఆర్టీసీ బస్సు సర్వీసులకు రూట్ క్లియర్ అవుతోంది. సెప్టెంబర్ 1 నుంచి కొత్త మార్గదర్శకాలు అమల్లోకి రానుండటంతో అధికారులు చర్చలకు సిద్ధమయ్యారు. కేంద్రం కూడా రాష్ట్రాల మధ్య ప్రయాణాలకు అనుమతించాలని స్పష్టమైన ఆదేశాలు ఇవ్వడంతో.. హైదరాబాద్‌కు బస్‌ సర్వీసులు తిప్పడంపై ఇరు రాష్ట్రాల ఆర్టీసీ అధికారులు హైదరాబాద్‌ బస్‌ భవన్‌లో సోమవారం భేటీ కానున్నారు. ఎన్ని సర్వీసులు నడపాలి అనే అంశంపై ఓ క్లారిటీకి రానున్నారు. ఈ వారంలోనే సర్వీసులు ఎప్పటి నుంచి ప్రారంభమవుతాయన్న అంశంపై క్లారిటీ రానుంది. వాస్తవానికి అన్‌లాక్‌ ప్రక్రియ ప్రారంభంకాగానే రెండు రాష్ట్రాల మధ్య బస్సుల్ని పునరుద్ధరించాలని ఏపీ అధికారులు భావించి అధికారులకు లేఖ రాశారు. కానీ కరోనా కేసుల తీవ్రత దృష్ట్యా తెలంగాణ ప్రభుత్వం అంతర్రాష్ట్ర బస్సు సర్వీసులు ప్రారంభించకూడదని భావించింది. కేవలం రాష్ట్రంలోని బస్సులు మాత్రమే తిప్పింది. ఆ తర్వాత ముఖ్యమంత్రి కేసీఆర్‌తో జరిగిన సమీక్షలో భాగంగా, అంతర్రాష్ట్ర సర్వీసులు ప్రారంభించే అంశాన్ని అధికారులు ప్రస్తావించారు. ఈ సందర్భంగా కేసీఆర్‌ కొన్ని కీలక సూచనలు చేశారు. రెండు ఆర్టీసీలు సమంగా బస్సులను నడిపేలా, ఒకే పరిమాణంలో కిలోమీటర్ల మేర తిరిగేలా ఈ సమయంలోనే ఒప్పందం చేసుకోవాలని సీఎం కేసీఆర్‌ ఆదేశించారు. ఏపీతో పాటు పొరుగునున్న మహారాష్ట్ర, కర్ణాటకలతో కూడా ఇలాంటి ఒప్పందం చేసుకోవాలన్నారు. ముఖ్యమంత్రి ఆదేశంతో ఓసారి తెలంగాణ ఆర్టీసీ అధికారులు విజయవాడ వెళ్లి ఏపీ అధికారుల సమావేశమైనా చర్చలు కొలిక్కి రాలేదు. కానీ రెండు రాష్ట్రాల మధ్య సమానంగా అంతరాష్ట్ర బస్సులు నడపాలని ఏపీఎస్‌ఆర్టీసీ, టీఎస్‌ఆర్టీసీలు గతంలోనే అవగాహనకు వచ్చాయి. హైదరాబాద్‌లో మరోసారి భేటీ కావాలని నిర్ణయించారు. బస్‌భవన్‌లో కొందరు అధికారులు, సిబ్బందికి కరోనా సోకటంతో ఈ భేటీ రద్దయింది. తాజాగా ఈసారి జరగనున్న భేటీలో చర్చలు కొలిక్కి వస్తే రెండు రాష్ట్రాల మధ్య ఆర్టీసీ బస్సులు తిరిగి ప్రారంభంకానున్నాయి. ఇప్పటివరకు ఏపీఎస్‌ఆర్టీసీ కర్ణాటకకు మాత్రమే సర్వీసులు నడుపుతోంది. తమిళనాడు, తెలంగాణలకు సర్వీసులు లేవు. ఈ రాష్ట్రాలకు ప్రైవేటు బస్సులు కూడా తిరగడం లేదు.

from Telugu News | తెలుగు వార్తలు | Online Telugu News | Latest News in Telugu https://ift.tt/2QiyAG7
via